জীৱৰ শ্বাস-প্ৰশ্বাস, বিজ্ঞান, সপ্তম শ্ৰেণী, শংকৰদেৱ শিশু নিকেতন, বেলতলা, গুৱাহাটী।

1. জীৱৰ শ্বাস-প্ৰশ্বাস বুলিলে কি বুজা?
উত্তৰ - সাধাৰণ অৱস্থাত বুকুৰ ভিতৰলৈ বায়ু সোমোৱা কাৰ্যক শ্বাস বা উশাহ আৰু বাহিৰলৈ ওলাই যোৱা কাৰ্যক প্ৰশ্বাস বা নিশাহ বোলে।

2. প্লিউৰা কাক বোলে?

উত্তৰ - আমাৰ হাঁওফাঁও দুটা আৱৰি থকা পাতল অথচ টান আৱৰণীখনকে প্লিউৰা বোলে।

3. মধ্যচ্ছদা কাক  বোলে?

উত্তৰ - বক্ষগহ্বৰৰ তলফালে থকা পেশীযুক্ত আৰু ডাঙৰ পৰ্দাখনকে মধ্যচ্ছদা বোলে।

4. মানুহৰ উশাহ-নিশাহ লোৱা প্ৰক্ৰিয়াটোৰ চমু বৰ্ণনা দিয়াঁ।

উত্তৰ - (গৃহকাৰ্য হিচাবে নিজে কৰিবাঁ)

5. বায়ৱীয় বা সবাত শ্বসন কাক বোলে?
উত্তৰ - অক্সিজেনৰ উপস্থিতিত হোৱা শ্বসন কাৰ্যক বায়ৱীয় বা সবাত শ্বসন বোলে।
6. অবায়ৱীয় বা অবাত শ্বসন কাক বোলে?
উত্তৰ - অক্সিজেনৰ অনুপস্থিতিত হোৱা শ্বসন কাৰ্যক অবায়ৱীয় বা অসবাত শ্বসন বোলে।

7. মানুহৰ দৰে হাঁওফাঁও থাকা কেইবিধমান প্ৰাণীৰ নাম লিখাঁ।

উত্তৰ - মানুহৰ দৰে হাঁওফাঁও নাথাকা কেইবিধমান প্ৰাণীৰ নাম হ’ল মাছ, বিভিন্ন এককোষী প্ৰাণী, বিভিন্ন পতংগ, কেঁচু আদি।

8.এমিবা কি?

উত্তৰ - এমিবা এবিধ পানীত থকা সৰল এককোষী প্ৰাণী।

9. এমিবাই ______ ৰ দ্বাৰা শ্বাস-প্ৰশ্বাস লয়।
উত্তৰ - কোষাৱৰণ

10. এমিবাই কিদৰে শ্বাস-প্ৰশ্বাস লয়?

উত্তৰ - এককোষী প্ৰাণী এমিবাৰ দেহ অতিকে সৰল। ই ইয়াৰ কোষাৱৰণৰ দ্বাৰাই শ্বাস-প্ৰশ্বাস লয়। ইয়াৰ কোষাৱৰণৰ মাজেৰে পৰিৱেশৰ পৰা অক্সিজেন কোষটোৰ ভিতৰলৈ সোমাই আহে, আৰু কোষাৱৰণখনৰ মাজেৰেই কোষত উত্পন্ন হোৱা কাৰ্বন ডাই-অক্সাইড বাহিৰলৈ ওলাই যায়।

11. বায়ুছিদ্ৰ বা স্পিৰাকল কাক বোলে?

উত্তৰ - পঁইতাচোৰাৰ লগতে সকলো পতংগৰে শৰীৰটোৰ দুয়ো কাষে কিছুমান সৰু সৰু ছিদ্ৰ থাকে। এই ছিদ্ৰবোৰক বায়ুছিদ্ৰ বা স্পিৰাকল বোলে।

12. পতংগই কিহৰ সহায়ত শ্বাস-প্ৰশ্বাস লয়?
উত্তৰ - পতংগই বায়ুনলী আৰু বায়ুছিদ্ৰৰ সহায়ত শ্বাস-প্ৰশ্বাস লয়।

13. পতংগৰ শ্বাস-তন্ত্ৰ সম্পৰ্কে ব্যাখ্যা কৰাঁ।

উত্তৰ - পতংগবোৰে বায়ুনলী আৰু বায়ুছিদ্ৰৰ সহায়ত শ্বাস-প্ৰশ্বাস লয়। ইহঁতৰ শৰীৰটোৰ দুয়োকাষে থকা সৰু সৰু ছিদ্ৰবোৰেই বায়ুছিদ্ৰ বা স্পিৰাক'ল। এইবোৰৰ পৰা ওলোৱা সৰু সৰু নলিকাবোৰ দেহৰ ভিতৰত লগ লাগি এখন জালিকাৰ সৃষ্টি কৰে। এইবোৰক বায়ুনলী বা শ্বাস-নলিকা বোলে। বায়ুমণ্ডলৰ পৰা অক্সিজেন সমৃদ্ধ বায়ু বায়ুছিদ্ৰইদি প্ৰথমে বায়ুনলিকাবোৰত সোমায় আৰু তাৰ পৰাই দেহৰ বিভিন্ন কোষলৈ যায়। এইদৰে কোষত উত্পন্ন বৰ্জনীয় কাৰ্বন ডাই-অক্সাইড প্ৰথমে বায়ুনলিকাবোৰত আহি পায়, আৰু তাৰ পৰাই বায়ুছিদ্ৰইদি বাহিৰলৈ ওলাই যায়। 

14. বায়ুনলী বা শ্বাস-নলিকা কাক বোলে?
উত্তৰ - পতংগসমূহে বায়ুছিদ্ৰ বা স্পিৰাক'লবোৰৰ মাজেৰে বাহিৰৰ পৰা গ্ৰহণ কৰা অক্সিজেন সমৃদ্ধ বায়ু যি নলিকাৰে দেহৰ ভিতৰলৈ সোমায়, বা কোষত উত্পন্ন হোৱা বৰ্জনীয় কাৰ্বন ডাই-অক্সাইড যিবোৰ নলিকাৰে বাহিৰলৈ ওলাই যায়, তাকে বায়ুনলিকা বা শ্বাস-নলিকা বোলে।

15. মাছৰ শ্বাস অংগবিধৰ নাম কি?
উত্তৰ - মাছৰ শ্বাস অংগবিধৰ নাম জলক্লোম বা ফুল বা গিল।

16. গিল (Gill) কি?
উত্তৰ - গিল (Gill) মাছৰ শ্বাস অংগ। ইয়াক অসমীয়াত জলক্লোম বা ফুল বোলে।

17. মাছে কিদৰে শ্বাস-প্ৰশ্বাস কাৰ্য সম্পন্ন কৰে?
উত্তৰ - (গৃহকাৰ্য হিচাপে নিজে কৰিবাঁ)

18. কেঁচুৱে কিহৰ সহায়ত উশাহ-নিশাহ লয়?
উত্তৰ - কেঁচুৱে ছালৰ সহায়ত উশাহ-নিশাহ লয়।

19. ভেকুলীয়ে কিহৰ সহায়ত উশাহ-নিশাহ লয়?
উত্তৰ - ভেকুলীয়ে হাঁওফাঁও আৰু ছালৰ সহায়ত উশাহ-নিশাহ লয়।

20. মাছৰ অতিৰিক্ত শ্বাস অংগবিধৰ নাম কি?
উত্তৰ - মাছৰ অতিৰিক্ত শ্বাস অংগবিধৰ নাম বায়ুমোনা (air bladder)।